ᖃᐅᔨᓴᕐᓂᖃᕐᓂᖅ ᐃᖅᑲᖅᑐᐃᓕᓂᕆᔨᒃᑯᑎᒍᑦ ᐊᐱᖅᓱᓐᓂᐅᕙᑦᑐᖅ ᐃᓄᓕᒫᑦ ᓴᖅᑭᑎᒃᓯᔪᓐᓇᖁᓪᓗᒋᑦ ᓇᓗᓇᐃᕈᑎᑦᓴᓂᑦ ᖃᓄᐃᑦᑐᒥᓂᐅᓂᖏᓐᓂᑦ ᑐᖁᔪᒥᓂᐅᑉ.

ᖃᐅᔨᓴᕐᓂᐅᔪᖅ ᑐᑭᐅᓯᒪᑎᑦᑎᓂᕐᒧᑦ ᐃᓄᓕᒫᓂᑦ ᖃᓄᐃᑦᑐᖃᕐᓂᕐᒪᖔᑦ ᐃᓅᔪᓐᓃᕐᑐᒥᓂᖅ ᐊᐱᖅᓱᓐᓂᖃᕈᑕᐅᓲᖑᕗᖅ ᑐᑭᓯᐅᒪᑎᑦᑎᓂᕐᒨᖓᒻᒪᑦ ᐃᓄᓕᒫᓂᑦ ᑐᑭᓯᐅᒪᒍᑎᐅᓪᓗᓂ ᖃᓄᐃᑦᑐᒥᓂᐅᓂᖓᓐᓂᑦ; ᐱᔭᕆᐊᑐᔪᒻᒪᕆᐊᓗᖕᓂᑦ ᖃᐅᔨᒪᔭᐅᔭᕇᖅᑐᐃᓪᓗ ᐃᓄᓕᒫᓄᑦ ᐊᐅᓚᓂᖃᖅᑎᑦᓯᓂᐅᔪᒥᑦ ᓇᓂᓯᒐᓱᐊᕐᓂᕐᒥᑦ ᑕᐃᒫᑦᓴᐃᓐᓇᖅ ᑐᖁᔪᖃᖁᔨᖏᒧᑦ.

ᖃᐅᔨᓴᕐᓂᖅ ᑲᔪᓯᒋᐊᖃᓪᓚᕆᑦᑐᖅ ᐊᓯᐊᒎᖅᕕᑦᓴᕋᓂ ᐃᓅᔪᓐᓃᑦᑐᖃᑐᒥᓂᐅᒍᓂ ᑎᒍᔭᐅᖅᑲᓯᒪᔪᒥ.

ᐱᖓᓲᔪᖅᑑᓗᑎᑦ ᓈᓚᒃᑏᑦ ᓂᕆᐊᖅᑕᐅᓲᖑᒻᒪᑕ ᓈᓚᒃᑎᔭᐅᔪᓂᑦ ᐸᑎᒻᒥᑎᑕᐅᓗᑎᑦ ᐊᖏᖅᑎᑕᐅᓗᑎᓪᓗ ᐃᒪᐃᓐᓂᐊᕐᓂᕐᒥᓂᑦ “ᑲᒪᒋᔭᖃᑦᓯᐊᕐᓂᐊᕐᓗᓂ ᖃᐅᔨᓴᕐᓂᐅᔪᒥᑦ ᑐᖁᔾᔪᑎᒥᓂᐅᔪᒥᑦ ᐊᒻᒪᓗ ᓴᖅᑭᑕᒃᓴᐅᔪᑦ ᓇᓗᓇᐃᕈᑎᒃᓴᑦ ᐃᓱᒪᓕᐅᕈᑎᒋᔪᓐᓇᕐᓗᒋᑦ ᖃᐅᔨᓴᕐᓂᐅᔪᒥᑦ ᑭᓇᐅᒻᒪᖔᑦ, ᖃᓄᖅ, ᖃᖓ, ᓇᒥ ᑭᓱᒧᓪᓗ ᐃᓅᔪᓐᓃᖅᓯᒪᔪᖅ ᑐᖁᓐᓂᕐᒪᖔᑦ ᐃᑲᔪᖅᓱᖏᓪᓗᑎᑦ ᒪᓗᒍᓱᖏᓂᖃᖏᓪᓗᑎᑦ ᑭᓇᑐᐃᓐᓇᕐᒥᑦ ᖃᐅᔨᒃᑲᐃᔪᓐᓇᕐᓗᑎᑦ ᐃᓱᒪᓕᐅᕈᑎᒋᔭᐅᔪᒥᑦ”.

ᐃᖅᑲᖅᑐᖅᑕᐅᓂᐅᖏᑦᑐᖅ ᖃᐅᔨᓴᕐᓂᐅᔪᖅ. ᑐᖁᖓᔪᓕᕆᔨ ᐊᐱᖅᓱᓐᓂᖃᕐᑎᒃᓯᔪᖅ ᑐᖁᖓᔪᓕᕆᔨᐅᓪᓗ ᑭᒡᒐᖅᑐᖅᑎᖓ ᖃᐅᔨᓴᕐᓂᐅᔪᒥᑦ ᑲᒪᒋᔭᖃᑦᓯᐊᕆᐊᖃᖅᐴᒃ ᑐᑭᓕᐊᑦᓯᐊᓕᕋᓗᐊᕐᒪᖔᑕ - ᓇᓗᓇᐃᖅᑕᐅᓯᓚᔪᓂᑦ ᓴᖅᑮᑎᑦᑎᓗᑎᑦ ᖃᓄᐃᓕᔭᐅᒍᑎᒥᓂᐅᔪᓂᑦ ᑐᖁᔾᔪᑎᒥᓂᐅᔪᒥᑦ ᓈᒻᒪᑦᓯᐊᖅᑐᒥᑦ ᓇᓕᒧᒌᑦᑐᓂᑦ ᐅᑯᐊᓗ ᓈᓚᑦᑏᑦ ᐊᑑᑕᐅᓂᐊᖅᑐᓂᑦ ᐊᑐᓕᖅᑕᐅᖁᔭᐅᔪᓂᑦ ᑲᔪᓯᑎᑕᐅᔪᓐᓇᑦᓯᐊᖅᑐᓂ ᐃᓱᒪᓕᐅᔪᓐᓇᖅᑎᑕᐅᓗᑎᑦ ᑕᐃᒫᖅᓴᐃᓐᓇᖅ ᑐᖁᔪᖃᑦᑕᐃᓕᒪᑎᑦᑎᓂᕐᒧᑦ ᓯᕗᓂᑦᑎᓐᓂ.

ᐱᔭᕆᐊᑐᔫᕙᑦᑐᑦ ᓴᖅᑭᑕᒃᓴᐅᔪᓄᑦ ᖃᐅᔨᓴᕐᓂᐅᔪᒥᑦ ᐊᑐᓗᐊᖅᑕᐅᕙᖏᑦᑑᒐᓗᐊᑦ ᐃᖅᑲᖅᑐᐃᕕᖕᒥᑦ ᑭᓯᐊᓂ ᐃᖅᑲᖅᑐᐃᕕᖕᒥᑦ ᐃᓕᖅᑯᓯᐅᔪᑦ ᖃᓄᕐᓗ ᒪᓕᑦᑕᒃᓴᐅᔪ ᐊᑐᖅᑕᐅᔭᕆᐊᖃᕐᒥᔪᑦ ᓴᐳᑎᓯᒪᓂᐅᔪᒥᑦ ᐱᒻᒪᕆᐅᓂᖃᕐᓂᖏᓐᓄᑦ ᐃᖅᑲᖅᑐᐃᔨᐅᑉ ᐊᐅᓚᓂᕆᕙᑦᑕᖏᑦ. ᐊᐱᖅᓱᖅᑕᐅᓂᐊᕐᑐᑦ ᐅᓂᒃᑳᕆᐊᖅᑐᓐᓂᐊᕐᓗᑎᑦ ᐅᐸᖁᔭᐅᓯᒪᓲᖑᕗᑦ ᖃᐅᔨᔭᒥᓂᕐᒥᓂᑦ ᖃᓄᐃᑦᑐᒥᓂᐅᓂᖓᓐᓂᑦ ᐃᓅᔪᓐᓃᖅᑐᒥᓂᐅᑉ. ᐃᑲᔪᖅᑎᖃᕐᓱᑎᑦ ᑐᖁᖓᔪᓕᕆᔨᐅᑉ ᑭᒡᒐᖅᑐᕐᑎᖓᓂᑦ ᐊᒻᒪᓗ ᑐᖁᖓᔪᓕᕆᔨᖕᒥᑦ, ᓈᓚᒃᑏᑦ ᐊᐱᖅᓱᔪᓐᓇᕐᓂᖃᕐᐳᑦ ᖃᐅᔨᔪᒥᓂᕐᓂᖅ. ᑎᒥᖕᒦᖔᖅᑐᒥᓃᑦ ᓇᓗᓇᐃᕈᑕᐅᔪᑦ ᓴᖅᑭᑕᒃᓴᐅᓗᑎᑦ ᓴᖅᑭᑕᐅᔪᓐᓇᖅᑐᑦ. ᑕᐃᒪᐃᓚᐅᖅᑎᓪᓗᒋᑦ ᓇᓗᓇᐃᖅᕈᑕᐅᔪᓂᑦ ᓴᖅᑮᓚᐅᖅᑎᓪᓗᒋᑦ, ᐃᓚᒋᔭᐅᔪᑦ ᑕᒡᕙᓂ ᐃᓗᐊᓂ ᓈᓚᒃᑎᖕᓄᑦ ᐊᑐᓕᖁᔭᖕᒥᓂᑦ ᑐᓴᖅᑎᒃᓯᔪᓐᓇᖅᐳᑦ ᐊᒻᒪᓗ ᖃᓄᖅᑑᒍᑕᐅᔪᓂᑦ ᑭᓱᓂᓪᓗ ᐊᑐᓕᖁᔭᐅᔪᓂᑦ. ᑐᖁᖓᔪᓕᕆᔨᐅᑉ ᑭᒡᒐᖅᑐᐃᔨᖓ ᐅᖃᐅᓯᒃᓴᒥᖕᓂᑦ ᓈᓚᒃᑎᓄᑦ ᓂᓪᓕᐊᓚᐅᕐᓗᓂ ᑕᐃᓐᓇᓗ ᑐᖁᖓᔪᓕᕆᔨ ᐅᖃᐅᓯᒃᓴᖕᒥᓂᑦ ᑎᓕᓯᔾᔪᑎᒋᔭᖕᒥᓂᑦ ᓈᓚᒃᑎᓄᑦ, ᐃᖅᑲᐃᑎᒋᐊᕐᓗᒋᑦ ᐸᑎᒻᒥᑎᑕᐅᓯᒪᓂᕆᓚᐅᖅᑕᖏᑦ ᑐᑭᓯᒋᐊᖅᑎᑦᑐᒋᓪᓗ ᒪᓕᒐᐃᑦ ᑐᑭᖏᓐᓂᑦ ᖃᓄᕐᓗ ᐊᑑᑎᖃᑦᑎᕐᓂᐊᕐᒪᖔᕐᒥᒋᑦ ᖃᐅᔨᒃᑲᐃᓂᐊᕐᓗᑎ ᐃᓱᒪᓕᐅᕈᑎᒋᔭᐅᔪᒥᑦ.

ᓈᓚᒃᑏᑦ ᐃᓱᒪᓕᐅᕈᑎᒋᔭᖏᑦ ᐊᑐᓕᖁᔭᐅᓯᒪᔭᖏᓪᓗ ᐅᖃᓕᒫᖅᑕᐅᓗᑎᑦ ᑐᖁᖓᔪᓕᕆᔨᖕᒧᑦ ᑕᐃᒫᑦ ᐱᓲᖑᒻᒪᑕ. ᑕᐃᒪᐃᓚᐅᖅᑎᓪᓗᒍ ᑐᖁᖓᔪᓕᕆᔨ ᖃᐅᔨᓴᕐᓂᐅᔪᒥᑦ ᐱᔮᕆᕐᓂᕋᐅᓗᓂ.

ᑕᐃᒪᐃᒃᑲᓗᐊᖅᑎᓪᓗᒋᑦ ᑐᖁᖓᔪᓕᕆᔨ ᓈᓚᒃᑎᓪᓘᓐᓃᑦ ᐊᑐᓕᖁᔭᐅᔪᒥᑦ ᑕᐃᒫᑦᓴᐃᓐᓇᖅ ᑐᖁᔪᖃᑦᑕᐃᓕᖁᔨᓂᕐᒥᓄᑦ, ᐃᓱᒪᓕᐅᖅᓯᒪᔭᕆᐊᖃᖏᑦᑐᑦ ᑭᓇ ᐸᓯᔭᐅᒻᒪᖔᑦ ᐱᕋᔭᖕᓂᖃᕐᓂᕐᒪᖔᕐᓗᓐᓃᑦ.