ᓄᓇᕗᒻᒥᑦ, ᑐᖁᖓᔪᓕᕆᔩᑦ ᑭᓇᑐᐃᓐᓇᐃᑦ ᑎᒃᑯᐊᖅᑕᐅᓯᒪᔪᑦ ᒪᓕᒐᓕᕆᔨᒃᑯᑦ ᒥᓂᔅᑕᖓᓐᓄᑦ. ᐊᔾᔨᐅᖏᑦᑐᒥᑦ ᐃᓕᓐᓂᐊᕐᓂᖃᖅᑎᑕᐅᒐᒥ ᐱᓕᒻᒪᓴᖅᑎᑕᐅᓪᓗᑎᑦ ᑐᖁᖓᔪᓕᕆᔨᐅᓂᕐᒧᑦ ᐅᓂᒃᑳᓕᐊᓕᐅᒍᓐᓇᖁᓪᓗᒋᑦ ᑐᖁᖓᔪᓕᕆᔨᐅᑉ ᐊᖏᔪᖄᖓᓐᓄᑦ. ᑐᖁᖓᔪᓕᕆᔩᑦ ᖃᐅᔨᓴᓲᖑᕗᑦ ᖃᓄᐃᓐᓂᖅᑕᖃᓐᓂᕐᒪᖔᑦ ᐃᓅᔪᓐᓃᑐᖃᓐᓂᖅᐸᑦ ᖃᓄᐃᔾᔪᑎᒥᓂᐅᔪᓪᓗ ᐊᓪᓚᑦᑕᐅᓯᒪᓂᕐᒥᓂᑦ ᓄᓇᕘᑉ ᑐᖁᖓᔪᓕᕆᔨᐅᑉ ᐱᖁᔭᙵᓐᓂᑦ.
ᑐᖁᖓᔪᓕᕆᔨᐅᑉ ᐱᓕᕆᐊᕆᕙᑦᑕᖏᑦ ᐊᔾᔨᒌᙱᓐᓂᖃᖅᑐᐃᓐᓇᐅᔪᑦ. ᐃᓛᓪᓕ, ᐃᓕᓐᓂᐊᕐᓂᖃᓂᖏᑦ ᑎᒃᑯᐊᖅᑕᐅᓯᒪᔪᑦ ᓇᓕᒧᖏᑦᓯᐊᕐᒪᑕ. ᓄᓇᕗᒻᒥᑦ ᑐᖁᖓᔪᓕᕆᔨᒋᔭᐅᔪᑦ ᑭᒃᑯᑐᐃᓐᓇᕐᓂᑦ ᓄᓇᕗᒻᒥᐅᑕᓂᑦ ᐱᔨᑦᑎᕋᖅᑎᑦᑎᖃᖅᐸᑦᑐᑦ. ᑕᒡᕙ ᐱᔭᐅᒍᒪᓂᐊᕈᓂ ᑐᖁᖓᔪᓕᕆᔨᒃᑯᓐᓄᑦ ᓄᓇᖅᑲᑎᖏᓐᓄᑦ ᓈᒻᒪᒋᔭᐅᑦᓯᐊᕐᓂᖓᓐᓄᑦ. ᒫᓐᓇᓐᓂᓴᐅᓕᖅᑐᑦ ᑐᖁᖓᔪᓕᕆᔨᒃᑯᑦ ᐱᔨᑦᑎᕋᖅᑎᑦᑎᔨᒋᔭᖏᑦ ᐱᓕᕆᐊᖃᑎᖃᖅᓱᑎᑦ ᑐᖁᖓᔪᓕᕆᔨᖕᓂᑦ, ᐸᓖᓯᒃᑯᓐᓂᑦ, ᐊᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᒪᓕᒐᓕᕆᓂᕐᒥᑦ ᖃᐅᔨᒪᔪᒻᒪᕇᑦ, ᐱᔨᑦᑎᕋᑎᐅᕙᑉᐳᑦ ᐃᓄᓕᒫᓄᑦ.
ᑐᖁᖓᔪᓕᕆᔨᐅᑉ ᒪᓕᒋᐊᓕᖓ, ᐸᖕᓇᓯᒪᑦᓯᐊᔪᓐᓇᕐᓂᖏᓐᓄᑦ ᐊᐅᓚᓂᖃᑦᓯᐊᕋᓗᐊᖕᒪᖔᕐᒥᓪᓗ ᐊᐅᓚᑦᑎᔨᖏᑕ ᐱᓕᕆᐊᕆᔭᐅᖁᔭᖏᓐᓂᑦ, ᑲᒪᒋᔭᐅᕙᑦᑐᖅ ᒪᓕᒐᓕᕆᔨᒃᑯᓐᓂᑦ. ᑕᐃᓐᓇᓕ ᑕᐃᒪᐃᑦᓯᐊᕋᓗᐊᕐᒪᖔᑕ ᐊᐅᒪᓂᕆᔭᐅᔪᑦ ᖃᐅᔨᓴᖅᑕᐅᕙᑦᑐᑦ ᑐᖁᖓᔪᓕᕆᔨᐅᑉ ᐊᖏᔪᖅᑳᖓᓐᓄᑦ.
ᑐᖁᖓᔪᓕᕆᔨᐅᑉ ᐱᔭᒃᓴᕆᕙᑦᑕᖏᑦ ᖃᓄᐃᑦᑐᖃᕐᓂᕐᒪᖔᑦ ᐃᓅᔪᓐᓃᖅᑐᖃᑳᓪᓚᓐᓂᖅᑲᑦ, ᑐᑭᓯᔭᐅᔪᓐᓇᐃᓕᓯᒪᔪᒥᑦ, ᐱᓂᓪᓗᖅᑕᐅᓯᒪᒍᓂ ᐊᒻᒪᓗ ᐊᓐᓂᐊᖑᙱᑦᑐᒧᑦ ᐃᓅᔪᓃᖅᑐᒥᓂᐅᒍᓂ. ᐃᒪᐃᑦᑐᐃᓐᓇᕆᐊᓕ ᑐᖁᖓᖅᓴᓕᖅᑎᓪᓗᒍ ᖃᐅᔨᓴᑦᑕᐅᓗᓂ, ᐃᓛᓐᓂᒃᑯᓪᓗ ᐃᖅᑲᖅᑐᐃᕕᒃᑯᑎᒍᑦ ᐊᐱᖅᓱᓐᓂᖃᕐᓗᓂ ᖃᐅᔨᓴᕐᓂᖅᑕᖃᓲᖑᕗᖅ. ᖃᐅᔨᓴᓚᐅᖅᑎᓪᓗᒋᑦ, ᑐᖁᖓᔪᓕᕆᔨ ᓇᓗᓇᐃᖅᓯᒐᔭᖅᐳᖅ ᑐᖅᑯᔾᔪᑕᐅᔪᒥᑦ ᐋᓐᓂᐊᒧ, ᐋᓐᓂᐊᖑᙱᑐᒧᓪᓘᓐᓃᑦ.
