ᐱᔨᑦᑎᕋᖅᑎᐅᔪᑦ ᑐᖁᖓᔪᓕᕆᓂᖕᒧᑦ ᐱᓕᕆᖃᑎᒌᑦᑐᑎᑦ ᑐᖁᖓᔪᓕᕆᔨᐅᓂᕐᒥᑦ ᓇᒥᑐᐃᓐᓇᖅ ᑲᓇᑕᒥ ᐊᑐᐃᓐᓇᖅᑕᖃᖅᑐᖅ.

ᑐᖁᖓᔪᓕᕆᔨ ᑕᐃᒫᑦ ᑕᐃᔭᓲᖅ ᐊᓐᓂᐊᖃᓐᓇᙱᑦᑐᓕᕆᓂᕐᒧᑦ-ᒪᓕᒐᓕᕆᓂᕐᒧᓪᓗ ᐃᓅᔪᓐᓃᖅᑐᖃᑐᐊᕐᒪᑦ ᖃᐅᔨᓴᖅᑎᒋᔭᐅᕙᖕᒪᑕ ᐃᓕᑕᕆᔭᐅᓯᒪᓂᕐᒥᓄᑦ ᐱᔭᐅᒍᒪᓯᒪᔪᑦ ᒪᓕᒐᓕᕆᔨᒃᑯᑦ ᒥᓂᔅᑕᖓᓐᓄᑦ ᑐᖁᖓᔪᓕᕆᔨᐅᑉ ᐊᖏᔪᖄᙵᓐᓄᑦ ᐱᔭᐅᔪᒪᔪᒥᓂᐅᒐᒥ.

ᑐᖁᖓᔪᓕᕆᔨᐅᑉ ᐱᓕᕆᐊᕆᓗᐊᖑᐊᖅᑕᓂ ᖃᐅᔨᓴᕐᓂᖃᕐᓂᐅᔪᒥᑦ ᐃᓘᓐᓇᐃᓂ ᖃᓄᐃᑦᑐᖃᑳᓪᓚᓐᓂᖓᓄᑦ, ᐊᓐᓂᐊᑰᙱᑦᑐᖅ, ᓂᕆᐅᒋᔭᐅᖏᑦᑐᒃᑯᑦ, ᐃᓄᑐᐊᒥᓂᐅᒍᓂ ᐊᒻᒪᓗ ᓇᓗᓇᐃᖅᑕᐅᓯᒪᒍᓐᓇᖏᒃᑯᓂ ᐃᓅᒍᓐᓃᕈᑕᐅᔪᖅ ᓄᓇᕗᒻᒥ.  ᑕᒪᓐᓇ ᐱᔨᑦᑎᕋᖅᑎᓪᓚᕆᓐᓂᐅᔪᖅ ᐃᓄᓐᓄᑦ ᐊᒻᒪᓗ ᐃᓚᒋᔭᐅᔪᓄᑦ ᐱᖃᑎᒋᔭᐅᔪᓄᓪᓗ ᐃᓄᔪᓐᓃᖅᑐᒥᓂᐅᑉ.

ᑐᖁᖓᔪᓕᕆᔨ ᐱᓕᕆᐊᖃᕆᐊᖃᓲᖑᕗᖅ ᓇᓗᓇᐃᔭᐃᒋᐊᖃᕐᓂᕐᒥᑦ ᖃᓄᐃᑦᑐᖅᑕᖃᕐᓂᕐᒪᖔᑦ ᐃᓅᒍᓐᓃᖅᑐᒥᑦ ᐊᒻᒪᓗ ᖃᐅᔨᒪᓗᓂ:

  • ᐃᓅᔪᓐᓃᖅᑑᑉ ᑭᓇᐅᓂᖓᓐᓂᑦ
  • ᖃᓄᖅ, ᖃᖓ, ᓇᒥ, ᖃᓄᐃᒃᑲᒥᓪᓗ ᐃᓅᔪᓐᓃᖅᑐᖅ ᑐᖁᑦᑕᕐᓂᒪᖔᑦ.

ᐃᓅᔪᓐᓃᖅᑐᖃᑐᐊᕐᒪᑦ ᓇᓗᓇᐃᖅᓯᔭᕆᐊᖃᕐᒪᑕ ᓇᓪᓕᐊᓂ ᐋᓐᓂᐊᒃᑯᑦ, ᐱᔮᖅᑯᑕᐅᖏᑦᑐᒃᑯᑦ, ᐃᓅᓯᕐᒥᑦ ᑭᐱᓯᓂᒃᑯᑦ, ᐃᓄᐊᕐᓂᒃᑯᑦ, ᓇᓗᓇᖅᑐᑦᑯᑦ.

ᑐᖁᖓᔪᓕᕆᔨᐅᑉ ᐱᔨᑦᑎᕋᓂᖓᓐ ᑐᑭᓯᐅᒪᑎᑦᑎᑐᐃᓐᓇᓂᕐᒨᖓᖏᑦᑐᖅ ᕿᒃᓵᒃᑐᓂᑦ ᖁᐊᖅᓵᓯᒪᔪᓂᓪᓗ ᐊᑐᐃᓐᓇᐅᓂᕐᒥᓄᑦ ᐃᓄᓕᒫᓂᑦ ᖃᐅᔨᒪᑎᑦᑎᕙᑦᑐᖅ ᑐᓴᖅᑕᐅᔭᕆᐊᓕᖕᓂ ᐃᓄᓕᒫᓄᑦ ᐊᑐᐊᓂᖃᒐᓗᐊᖅᐸᑕ ᐃᓅᔪᓄᑦ ᑐᖁᖓᔪᓄᓪᓗ ᖃᓄᐃᓐᓂᖏᑦ.

ᑐᖁᖓᔪᓕᕆᔨ ᒪᑯᓇᙵ ᐊᑐᓕᖁᔨᒍᓐᓇᖅᑐᖅ ᐊᖅᑭᐅᒪᒋᐊᕈᑎᐅᔪᓂᑦ ᐊᑦᑕᓇᑦᑕᐃᓕᒪᓂᕐᒧᑦ ᐊᒻᒪᓗ ᖃᓄᐃᑦᑕᐃᓕᒪᓂᕐᒨᖓᔪᓄᑦ ᓯᕗᓂᑦᑎᓐᓂ ᑕᐃᒫᑦᓴᐃᓐᓇᖅ ᐃᓅᒍᓐᓃᖅᑐᖃᖁᔨᒐᓂ.

ᑐᖁᖓᔪᓕᕆᔨᐅᑉ ᐱᔨᑦᑎᕋᕐᓂᖓ ᓇᓗᓇᐃᖅᓯᒐᓱᐊᕐᓂᐅᔪᒥᑦ ᖃᓄᐃᑦᑐᖃᓪᓚᑦᑖᕐᓂᕐᒪᖔᑦ, ᐸᓰᕆᓂᕐᒨᔾᔭᖏᑦᑐᓪᓕ ᖃᓄᐃᑦᑐᖃᕐᓂᖓᓐᓂᑦ, ᐃᒻᒥᑰᓕᖓᓪᓗᓂ ᐊᑐᐃᓐᓇᐅᓂᖓᑦ ᐱᔨᑦᑎᕋᖅᑎᐅᓗᓂ ᐃᓚᒌᓐᓄᑦ, ᓄᓇᓕᖕᓄᑦ, ᒐᕙᒪᖃᕐᕕᐅᔪᓄᑦ ᐊᒻᒪᓗ ᐊᓯᖏᓐᓄᑦ ᐱᓕᕆᖃᕐᕕᐅᔪᓄᑦ.

“ᓂᐱᒋᔭᐅᕗᒍᑦ ᑐᖁᖓᔪᓄᑦ ᓴᐳᑎᓯᒪᓂᕐᒧᑦ ᐃᓅᔪᓂᑦ”

ᑐᖁᖓᔪᓕᕆᔨᐅᑉ ᐊᖏᔪᖄᖓᑕ ᐱᓕᕆᒡᕕᖓ ᓄᓇᕗᒻᒥ ᐱᔨᑦᑎᕋᖅᑎᐅᕙᑦᑐᖅ ᕿᒪᑦᑕᐅᔪᓄᑦ ᑲᒪᒋᔭᖃᑦᓯᐊᕐᓗᑎᑦ ᖃᐅᔨᓴᖅᐸᒻᒪᑕ ᐃᓅᒍᓐᓃᖅᑐᒥᑦ ᓈᓚᑦᑎᖃᕐᓗᑎᓪᓗ ᐊᐱᖅᓱᓐᓂᖃᑎᑦᓯᓪᓗᑎᒃ ᑲᒪᒋᔭᖃᑦᓯᐊᕆᐊᖃᕐᓂᕐᒥᓄᑦ ᐃᓅᔪᓐᓃᔾᔪᑕᐅᔫᑉ ᐱᔾᔪᑎᒋᔭᖓ ᑐᐊᕕᐊᕆᔭᐅᖏᓪᓗᓂ, ᑐᑭᓯᐅᒪᑎᑦᓯᔨᐅᓗᓂ ᓱᕐᓗ ᖃᐅᔨᒃᑲᐃᑕᐃᓕᒪᖏᓪᓗᓂ, ᖁᔭᓈᖅᓯᓯᒪᖏᓪᓗᓂᓗ.  ᑕᒪᒃᑯᐊ ᓇᓗᓇᐃᖅᑕᐅᔪᑦ ᐱᒋᐊᖅᑎᑦᓯᒍᑕᐅᕙᑉᐳᑦ ᐊᑐᓕᖁᔭᐅᓯᒪᔪᓂᑦ ᐊᖅᑭᐅᒪᒃᑲᓐᓂᕈᑎᐅᒐᔭᖅᑐᓂᑦ ᐃᓄᓕᒫᓄᑦ ᐊᒻᒪᓗ ᑕᐃᒫᑦᓴᐃᓐᓇᖅ ᐃᓅᔪᓐᓃᖅᑐᖃᑦᑕᐃᓕᖁᔨᓂᕐᒥᓄᑦ ᓯᕗᓂᑦᑎᓐᓂ.

ᐅᕗᖓ ᐅᖃᕐᕕᐅᔪᓐᓇᖅᑐᒍᑦ:

ᐊᓪᓚᒡᕕᖓ ᑐᖁᖓᔪᓕᕆᔨᐅᑉ ᐊᖏᔪᖄᖓᑕ

ᑎᑎᖅᑲᖃᐅᑎᖓᑕ ᓈᓴᐅᑎᖓ 1000, ᓇᓗᓇᐃᒃᑯᑕᖓ 590

ᐃᖃᓗᐃᑦ, ᓄᓇᕗᑦ X0A 0H0

Toll Free # 1- 844- 778- 1022

ᐅᖄᓚᐅᑎᖓᑕ ᓈᓴᐅᑎᖓ: (867) 975-6562  ᓱᒃᑲᔪᒃᑯᑦ: (867) 975-6367

ᐅᖄᓚᐅᑎᕋᓛᖓᑕ ᓈᓴᐅᑎᖓ: (867) 222-9472