ᑎᑎᖅᑲᕐᑎᒍᑦ ᑐᑭᓯᐅᒪᑎᑦᑎᓂ ᖃᓄᖅ ᑐᖁᖓᔪᓕᕆᔨᐅᓂᕐᒥᑦ ᐱᔨᑦᑎᕋᖅᑎᐅᔪᑐᖄᓗᓂᖏᓐᓂᑦ
ᐊᓪᓚᒡᕕᖓ ᑐᖁᖓᔪᓕᕆᔨᐅᑉ, ᐱᒋᐊᙵᓂᖃᓚᐅᖅᓯᒪᔪᖅ ᓯᕗᓪᓕᕕᓂᑦᑎᓐᓂᑦ ᑯᐃᓐ ᓄᓇᖓᓐᓂᑦ ᐊᖅᓵᖅᓯᓚᐅᑐᐃᓐᓇᑎᓪᓗᒍ ᓄᐊᒪᓐ ᓄᓇᑖᕐᒥᓂ ᑕᒫᓂᖃᐃ 1066ᖑᑎᓪᓗᒍ, ᑕᒪᓐᓇᓗ ᒪᓕᑦᓴᖅᑕᖐᓐᓇᖅᓱᓂ ᓄᓇᒋᔭᓕᖕᓄᑦ ᒪᓕᒐᕐᓂᐊᓂᖃᖅᑐᓂ ᐊᖓᔪᖅᑳᖃᕐᓂᖏᓐᓄᑦ ᑯᐃᓐ ᓄᓇᑦᓴᔭᖓᓐᓂᑦ ᐃᓚᖓᓐᓂᓪᓘᓐᓃᑦ ᒪᓕᒐᖏᑕ ᐊᑐᐊᖅᑕᖏᓐᓂᑦ ᒪᓕᑦᓴᐅᑎᓯᒪᓂᖏᓐᓄᑦ. ᐅᓇᓗ ᐊᑎᖃᕐᓂᖓ ᐊᓯᔾᔨᖃᑦᑕᖅᓯᒪᓪᓗᓂ “ᑐᖁᖓᔪᓕᕆᔨᐅᓂᕋᖅᑕᐅᓪᓗᓂ” ᑮᖕ ᔮᓐ ᓯᕗᓕᐅᖅᑎᓪᓚᕆᒋᔭᐅᙱᓪᓗᒍ ᐅᓇᓗ “ᑭᒡᒐᖅᑐᐃᓕᕆᔨ” ᐊᕙᓂ ᓯᒃᑳᓯᓐᓄᑦ ᑕᐃᔭᐅᕙᓐᓂᕆᓪᓗᓂ.
ᓯᕗᓪᓕᕐᒥᑦ ᐱᓕᕆᐊᖃᓪᓗᐊᑕᖃᑦᑲᓚᐅᖅᑐᑦ ᑐᖁᖓᔪᓕᕆᔩᑦ ᖃᓄᐃᒻᒪᑦ ᐃᓅᔪᓐᓃᖅᑐᖃᑳᓪᓚᑦᑕᖕᒪᖔᒻᒥ ᐊᒻᒪᓗ ᓂᕆᐅᓐᓇᖏᑦᑐᒃᑯᑦ ᑐᖁᔪᖃᑐᐊᕋᐃᒪᑦ. ᐱᔭᒃᓴᕆᖕᒪᒍ ᑭᒡᒐᑐᐃᓕᕆᔨᐅᑉ ᓇᓗᓇᐃᖅᓯᔭᕆᐊᖃᕐᓂᖓᓐᓂᑦ ᖃᓄᐃᑦᑐᖃᓪᓚᑦᑖᕐᓂᕐᒪᖔᑦ ᑐᖁᔪᖃᖅᑐᒥᓂᐅᑉᐸᑦ. ᐱᔭᕆᐊᑐᔪᓂᑦ ᐊᓯᐊᒎᖅᕕᒃᓴᖃᖏᑦᑐᓂᑦ ᐊᐅᓚᓂᖃᓲᖑᕗᑦ ᖃᐅᔨᓴᖅᑎᓪᓗᒋᑦ ᑐᖁᔪᖃᑐᐊᕋᐃᒻᒪᑦ ᓂᕆᐅᓐᓇᙱᑦᑐᒃᑯᑦ, ᖃᖓᑐᐃᓐᓇᖅ ᐱᕋᔭᑕᐅᒐᓱᐊᕈᓂ ᒪᓕᑦᑕᒃᓴᐅᔪᖅ ᓇᒻᒥᓂᖅ ᐅᖁᒪᐃᑦᑐᑰᖅᑎᑉᐸᑦᑐᖅ ᑮᓇᐅᔭᖅᑎᒍᑦ ᐊᑭᓖᑎᑕᐅᓗᓂ ᐊᓄᓪᓚᓯᖅᑕᐅᕙᒻᒪᑕ.
ᒪᑯᐊ ᒪᓕᒃᑕᐅᔭᕆᐊᓖᑦ ᐱᔭᕆᐊᑐᔫᓪᓗᑎᒃ ᐃᓚᖓᒍᑦ ᐳᐃᒍᐃᖃᑦᑕᖅᑐᒃᓴᐃᖕᒪᑕ, ᑕᐃᒪᐃᒻᒪᓐ ᐊᒃᓱᕈᓐᓇᖅᑐᒃᑰᕐᑎᑉᐸᑦᑐᖅ ᓇᒻᒥᓂ ᐊᑭᓖᑎᑕᐅᒍᓂ ᑕᒻᒪᖅᑐᒥᓂᐅᓂᖓᓐᓄᑦ. ᐊᓪᓛᓕ ᐃᒪᐃᖃᑦᑕᑐᐃᓐᓇᓕᖅᓱᑎᑦ ᑕᑯᑐᐃᓐᓇᖃᑦᑕᖅᓱᑎ ᑎᒥᖕᒥᑦ ᐃᔨᖅᓯᓯᒪᓪᓗᑎᓪᓘᓐᓃᑦ. ᐃᓚᖏᓪᓗ ᑎᒥᖕᒥᑦ ᐅᓂᐊᖅᓯᓪᓗᑎᑦ ᐅᓐᓄᐊᒃᑯᑦ ᓄᓇᓕᐅᑉ ᐊᓯᐊᓄᑦ ᑲᒪᒋᔭᕆᐊᖃᕐᓂᐊᒍᓐᓃᕋᒥᐅᒃ.
ᖃᐅᔨᒃᑲᖅᑕᐅᓯᒪᖏᑦᑑᒍᓂ ᑐᖁᖓᔪᓕᕆᔨ ᐱᓂᕐᓗᓂᕋᑕᐅᕗᖅ ᓄᓇᓖᑦ ᓄᓇᖅᑲᐃᓪᓗ ᐱᕋᔭᑦᑐᒥᓂᖅᑎᑐᑦ ᐱᔭᐅᓗᑎᑦ ᖄᖓᒍᒃᑲᓐᓂᖅ ᐊᑭᓖᑎᑕᐅᕙᒻᒪᑕ ᖃᐅᔨᔭᐅᔪᓐᓇᐃᓕᑐᐊᕋᒥ ᐃᓄᐊᖅᓯᓯᒪᔪᖅ. ᑕᐅᕙᓂ ᑯᐃᓐ ᓄᓇᖓᑕ ᐃᓚᖓᓐᓂᑦ ᐱᖓᓐᓇᖅᐸᓵᓂ, ᑕᐃᑦᓱᒪᓂᑐᖃ ᐊᕌᒍᐃᑦ 1200ᖏᓐᓃᑎᓪᓗᒋᑦ, ᐃᓗᕕᖃᕐᕕᒃᓴᓕᐅᓚᐅᖅᓯᒪᓐᓂᕐᒪᑎ ᐃᓗᕕᖅᑕᐅᓂᐊᑐᐃᓐᓇᖅᑐᓄᑦ, ᕿᒻᒦᑦ ᐸᒡᕕᓴᖅᑐᐊᓘᕙᓕᕐᓂᕐᒪᑕ ᑐᖁᖓᔪᓕᕆᔨ ᑎᑭᒐᓱᐊᕐᓂᖓᓐᓂᑦ. ᐅᑯᐊ ᐸᒡᕕᓴᖅᑕᐅᑦᑕᐃᓕᓯᒪᒋᐊᖃᕐᓂᕐᒪᑕ ᑎᒦᑦ ᑐᖁᖓᔪᓕᕆᔨᐅᑉ ᕿᒥᕐᕈᓚᐅᖏᑎᓪᓗᒋ ᑕᒻᒪᓐᓇ ᓯᖁᒻᒥᖅᓯᓯᒪᓂᕋᖅᑕᐅᓪᓗᓂ ᒪᓕᒐᕐᓂᑦ. ᒪᑯᐊ ᑐᖁᖓᔪᓕᕆᔩᑦ ᑕᐃᒫᑦ ᐱᔭᒃᓴᖃᐃᓐᓇᐅᔭᓚᐅᖅᐳᑦ ᐊᕐᕌᒍ 1980ᖏᓐᓄᑦ ᑎᑭᑦᑐᒍ.
ᑕᒪᓐᓇ ᐱᔭᒃᓴᕆᔭᐅᕙᖕᓂᖓ ᑐᖁᖓᔪᓕᕆᔨᐅᑉ ᐱᓕᕆᒡᕕᐊᑕ ᐊᓯᔾᔨᖅᑕᐅᓯᒪᔪᖅ ᐊᕐᕌᒍᒐᓴᐃᑦ ᐃᓗᐊᓂ, ᐃᓚᖓᒍ ᓱᓕ ᓴᖅᑭᔮᒃᑲᓗᐊᖅᓱᑎᑦ ᐃᖅᑲᑐᐃᔨᓄᑦ ᒪᓕᒐᕆᔭᐅᔪᓂᑦ ᐊᑐᖅᑕᐅᕙᑦᑐᓂ. ᑐᖁᖓᔪᓕᕆᔨᐅᑉ ᐱᖁᔭᖓᑦ ᐱᒋᐊᖅᑎᒃᓯᓯᒪᕗᖅ ᓄᓇᕗᒻᒥ ᐊᑐᐃᓐᓇᖅᑕᖃᓂᖁᓪᓗᒍ ᑐᖁᖓᔪᓕᕆᔩᑦ ᐱᔨᑦᑎᕋᖅᑎᖏᓐᓂᑦ.
ᒪᕐᕈᐃᓕᖓᒻᒪᑎᒃ ᐃᓅᔪᓐᓃᑐᖃᕈᓂ ᖃᐅᔨᓴᖅᑕᐃᓇᖅᑐᓂᑦ ᒪᓕᑦᑕᐅᔭᕆᐊᓕᖕᓂᑦ ᑲᓇᑕᒥ: ᑐᖁᖓᔪᓕᕆᔨᐅᑉ ᒪᓕᒋᐊᓕᖏᑦ ᐊᒻᒪᓗ ᑐᖁᔾᔪᑕᐅᓲᓄᑦ ᖃᐅᔨᓴᖅᑏᑦ ᒪᓕᒋᐊᓕᓕᐅᖅᑕᐅᓯᒪᖕᒥᒻᒪᑦ. ᑐᖁᖓᔪᓕᕆᔨᐅᑉ ᒪᓕᒋᐊᓕᖏᑦ ᑎᓴᒪᓪᓗᐊᖑᓪᓗᑎᑦ ᐱᔭᒃᓴᕆᕙᒃᑕᖏᑦ ᑕᒡᕙ: ᖃᐅᔨᓴᖕᓂᐅᔪᖅ, ᐊᐅᓚᑦᓯᔨᓄᑦ ᑎᑎᕋᖅᓯᒪᓂᒃᑯᑦ ᓇᓗᓇᐃᔭᐃᒋᐊᖃᕐᓂᖅ, ᒪᓕᒐᓕᕆᓂᕐᒨᖓᔪᑦ ᐊᒻᒪᓗ ᖃᓄᐃᑦᑕᐃᓕᑎᑦᑎᓂᕐᒧᑦ. ᑐᖁᔾᔪᑕᐅᓲᓄᑦ ᖃᐅᔨᓴᖅᑏᑦ ᒪᓕᒋᐊᓕᓕᐅᖅᑕᐅᓯᒪᓂᖓᑦ ᐱᓕᕆᐊᒋᕆᐊᓕᖏᑦ ᒪᑯᐊ ᐊᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᐊᐅᓚᑦᓯᔨᒋᔭᖕᒥᓄᓪᓗ ᐃᓚᖃᖅᓱᓂ. ᑐᖁᖓᔪᓕᕆᔨ ᑐᖁᔾᔪᑕᐅᓲᓄᑦ ᖃᐅᔨᓴᖅᑎᓪᓗ ᑕᒪᒃᑭᒃᓱᑎᑦ ᑎᒍᓯᓲᖑᕗᑦ ᐊᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᐊᓯᖏᓐᓂᑦ ᐱᑕᖃᖅᐸᑦ ᓇᓗᓇᐃᕈᑎᒃᓴᐅᔪᓂᑦ ᐃᓱᒪᓕᐅᓯᒪᔭᕆᐊᖃᕐᓂᖏᓐᓄᑦ ᐊᓐᓂᐊᖅᑐᓕᕆᓂᕐᒨᖓᓐᓂᕐᒪᖔᑦ ᐊᒻᒪᓗ ᖃᓄ ᐃᓅᔪᓐᓃᔾᔪᑕᐅᓂᖓ. ᑐᖁᖓᔪᓕᕆᔨᐅᑉ ᖃᐅᔨᓴᖅᐸᑦᑕᖏᑦ ᖃᐅᔨᓴᕈᑎᒥᓂᐅᔪᑦ, ᐃᓱᒪᓕᐅᓯᒪᓕᕐᓗᓂ ᓇᓗᓇᐃᖅᓯᒪᔭᖕᒥᓂᑦ ᖃᓄᐃᑦᑐᒥᓂᐅᓂᖓᓐᓂᑦ ᑐᖁᔾᔪᑎᒥᓂᐅᔪᖅ ᐊᒻᒪᓗ ᐊᑐᓕᖁᔭᖕᒥᓂᑦ ᓴᖅᑭᖅᓯᓪᓗᓂ ᑕᐃᒫᑦᓴᐃᓐᓇᖅ ᐃᓅᔪᓐᓃᖅᑐᖃᖁᔨᒐᓂ ᓯᕗᓂᑦᑎᓐᓂ.
